OFICIALAJ INFORMOJ
Numero 4 - 2006 10 20
Raporto pri la publika kunsido de la Akademio dum la Universala Kongreso en Florenco - 2006-08-01
Ĉeestis (almenaŭ parte): Geraldo Mattos (prezidanto), Marc Bavant, Vilmos Benczik, Gerrit Berveling, Werner Bormann, Renato Corsetti, Miguel Gutiérrez Adúriz, Christer Kiselman, François Lo Jacomo, Anna Löwenstein, Carlo Minnaja, Brian Moon, Sergio Pokrovskij, Otto Prytz, Spomenka Štimec, Humphrey Tonkin, Amri Wandel kaj Bertilo Wennergren.
Prezidis tute en la komenco Geraldo Mattos, kiu tuj post la enkonduko lasis la prezidadon al Brian Moon.
Enkonduke la ĉeestantaj direktoroj prezentis la laboron de siaj respektivaj Sekcioj. M. Bavant raportis pri la laboro de la Sekcio pri faka lingvo, (nuna nomo de la sekcio laboranta en la statuta agadkampo "teknikaj vortaroj"), kiun li estras. La ĉefa punkto de la laborplano koncernis la kriteriojn alprenendajn por akademia aprobo de terminaroj. Ĉi tiu punkto tamen estis ŝovita al la venonta periodo pro okupiteco de la sekcianoj en pli urĝaj Akademiaj taskoj, i.a. la 9-a OA. Sed la Sekcio povis progresi sur la kampo de disponigo de malnovaj fakaj tekstoj danke al la laboro de eksterakademiaj fakaj kunlaborantoj, kiujn ĝi kuraĝigis kaj laŭeble helpis. Ekz-e aperis en la reto parto de la Pekoteko de ak. Eichholz, pro iniciato de Roland Rotsaert, kaj la Sekcio intencas transformi la materialon al datumbaza formo kaj doni pritakson pri ĝi. Danke al Miroslav Malovec aperis en la Scienca kaj Teknika E-Bilioteko (STEB) grava historia teksto de Eugen Wüster, patro de terminologio kaj interlingvistiko ("Konturoj de la lingvonormigo en la tekniko"). Cetere la Sekcio akiris de Biblioteko Hodler kopiojn de du gravaj verkoj fare de Rollet de l'Isle: "Provo de marista terminaro" (1908), poste enretigita de Jurij Finkel kaj "Scienca fundamenta Esperanta terminaro" (1931), kun la celo ĝin same enretigi, tamen kun necesa kritika komentaro.
Marc Bavant ankaŭ raportis, ke laŭ peto de la respondeculoj de la retkursaro lernu.net la Akademio akceptis la taskon lingve revizii parton de tiuj kursoj. Unue la Sekcio pri gramatiko estis komisiita okupiĝi pri tio, sed baldaŭ la estraro de la Akademio decidis, ke speciala sekcio estus pli taŭga kadro. La starigita Speciala sekcio pri lerniloj konsistas el Marc Bavant (kunordiganto), Renato Corsetti, Sergio Pokrovskij kaj Bertilo Wennergren. Estis reviziitaj la du ĉefaj kursoj, nome "Ana Pana" kaj "Ana renkontas..." laŭ la principoj, ke krom senerara lingvaĵo al lernantoj oni prefere instruu oficialajn radikojn kaj ne provu influi la lingvan evoluon. La laboro en la Komisiono bone pasis kaj ĝiaj korektoproponoj estis enpraktikigitaj en la koncerna kursaro. La Komisiono intencas daŭrigi la laboron per almenaŭ unu plia kurso en la venonta periodo.
Bertilo Wennergren aparte prezentis la staton de la laboroj de la Sekcio pri la ĝenerala vortaro kaj parolis pri la 9-a Oficiala Aldono. Post dumonata periodo de diskuto en la Pleno, unua raporto de la Sekcio estis retirita, kaj post plia diskutado en la Sekcio la pleno voĉdonos pri reredaktita raporto.
Brian Moon raportis nome de la neĉeestanta Probal Daŝgupto pri la laboroj de la Sekcio pri prononco, kies teksto pri la uzo de alternativaj skrib-manieroj en difinitaj okazoj estas nun debatata en la Pleno. Carlo Minnaja raportis pri la Komisiono pri historio.
Sekvis al ĉi tiuj enkondukoj la sinprezento de ĉiuj aliaj akademianoj sur la podio.
Poste estis responditaj la jenaj demandoj de la publiko:
- Kiel oni redonas en Esperanto la konceptojn "jin" kaj "jang"? La demandinto observas ke foje oni parolas pri "jina" kaj "janga" kiel adjektivo, foje pri "jino" kaj "jango" kiel substantivo, foje en la neasimilita formo "jin" kaj "jang". Temas pri la du kontraŭaj principoj regantaj la mondon laŭ difinita filozofio orienta.
- Demando pri la indeco havi tabelon priskribantan la E-ajn fonemojn laŭ la Internacia Fonetika Alfabeto en la komenco de PIV.
- Ĉu la esprimo "dank’ al" estas ĝusta? Ĉu ne devus esti "danke al"?
- Ĉu azianoj vere akceptos Esperanton kaj forlasos siajn alfabetojn?
- Kial oni diras "biologo/biologio" kaj ne pli regule "biologio/biologiisto"?
- Ĉu lernolibroj utiligas la oftecolistojn de la Akademio (aperis listo dividita en naŭ grupoj) kaj ĉu entute lernolibroj sekvas la sugestojn de AdE
- Propono pri distingo pere de sufikso inter transitivaj kaj netransitivaj verboj, tiel ke oni ne havu dubojn (komenci-komenciĝi).
- Pri la radiko handikap- kaj pri eventualaj alternativaj radikoj.
La estraro de la Akademio de Esperanto interkonsente kun la koncernataj direktoroj de la Sekcioj kaj Komisionoj.