OFICIALAJ INFORMOJ
Numero 31 – 2020 03 10
Sekcio pri Kontrolado de Lerniloj
Laŭ instigo de Espéranto-France, ĝia eldonisto, la Sekcio reviziis novan eldonon de la franca lernilo “Metodo 11”, kiu aperos en 2020.
La tekston diversnivele kontrolis membroj de la Sekcio pri Kontrolado de Lerniloj sub la gvido de franca sekciano Marc Bavant. La kolektivo konsistis el 8 Akademianoj el 6 naciaj lingvoj. La sekcianoj priparolis diversajn elementojn kaj eblajn problemojn en la teksto. Ili debatis pri proponotaj solvoj. La laboro en la Sekcio antaŭeniris rapide por ne malhelpi la eldonplanon de la verko.
Fine de la Sekcia laboro, Marc Bavant kunsidis kun redaktistoj de la lernilo kaj rekte transdonis kaj klarigis la konsilojn kaj rekomendojn de la Sekcio.
La eldona kolektivo plejparte akceptis la Akademiajn proponojn, kaj kreis finan version, kiun ni kontrolis denove.
La verko aperos kun la indiko sur la unua paĝo “Ĉi tiun kurson lingve reviziis la Sekcio pri Kontrolado de Lerniloj de la Akademio de Esperanto”.
Lee Miller, Direktoro de la Sekcio, marto 2020